1642. Jab insaan tijaarat, san’at wa harfat ya dusre kaam dhando se rupayya paisa kamaaye maslan agar koi ajeer ban ke kisi matoofi ki namaazein padhe aur roze rakhe aur isii tarah kuch rupayya kamaaye lehaaza agar woh kamayii khud ooske aur ooske ahl-o-ayaal saal bhar ke akhrajaat se zayaada ho to zaruri hai ke zaay’ed kamaayi ka khums ya’ni paanchwa hissa oos tariqe ke mutabiq de jiski tafseel ba’d mein bayaan hogi.
1643. Agar kisi ko kamaayi ke baghair koi aamdani ho jaaye siwaaye kuch oon cheezon ke jo aane waale massa’el mein istenasha kiya jaayega maslan koi shakhs jise bataur tahaffuz koi cheez de aur woh oos ke saal bhar ke akhrajaat se zayaada ho to zaruri hai ke ooska khums de.
1644. Aurat ko jo meher milta hai aur shauhar biwi ko talaaq-e-khula dene ke a’ewaz jo maal haasil karta hai oon par khums nahi hai. Yahi hukm diyyat ke taur par milne waali raqam ka hai aur isi tarah se miraas ke mo’atbar qawa’ed ki row se jo miraas insaan ko mile ooska bhi yahi hukm hai. Agar kisi shi’a musalmaan ko ooske al’awa kisi aur zariye maslan ta’aseeb ke zariye miraas mile to oose aamdani samjha jaayega aur ooska khums nikaalna zaruri hai. Isii tarah agar oose baap aur bete ke al’awa kisi aur ki taraf se miraas mile ke jiska khud oose gumaan tak na ho to Ehtayaat-e-Waajib yeh hai ke woh miraas agar ooske saal bhar ke akhrajaat se zyada ho to ooska khums de.
1645. Agar kisi shakhs ko koi miraas mile aur oose ma’loom ho ke jis shakhs se oose yeh miraas mili hai oosne ooska khums nahi diya tha to zaruri hai ke waaris ooska khums de. Isii tarah agar khud oos maal par khums waajib na ho aur waaris ko yeh ilm ho ke jis shakhs se oose maal wa rupayye wirse mein mil raha hai oos shakhs ke zimme khums waajib-ul-ada tha to zaruri hai ke ooske maal se khums ada kare. Laikin dono suurato mein jis shakhs se maal wa rupayye mile ho agar woh khums dene ka m’atqad na ho ke woh khums deta hi na ho to zaruri nahi ke woh khums waris ada kare jo oos shakhs par waajib tha.
1646. Agar kisi shakhs ne kaffayiyat-e-sha’ari ke sabab saal bhar ke akhrajaat ke ba’d kuch raqam pas andaaz ki ho to zaruri hai ke bachat ka khums de.
1647. Jis shakhs ke tamaam akhrajaat koi dasra shakhs bardaasht karta ho to zaruri hai ke jitna maal ooske haath aaye ooska khums de.
1648. Agar koi shakhs apni ja’edaad kuch khaas afraad maslan apni aulaad ke liye waqf kar de aur woh log oos jae’daad mein kheti baadi shajarkaari kare aur oosse moonafa kamaye aur woh kamaayi oonke saal bhar ke akhrajaat se zayaada ho to zaruri hai ke oos kamayi ka khums de. Neiz yeh ke agar woh kisi aur tariqe se oos jae’daad se nafa haasil kare maslan oose kiraaye ya (theke) par de to zaruri hai ke nafa ka jo miqdaar oonke saal bhar ke akhrajaat se zayaada ho ooska khums de.
1649. Jo maal kisi faqeer ne kisi waajib sadqe maslan kaffarraat ya radde mazaalim ya mustahab sadqe ke taur par hasil kiya ho agar woh ooske saal bhar ke akhrajaaat se zayaada ho ya joo maal oose diya gaya ho oos ke saal bhar ke akhrajaat se zayaada ho to ehtayaat-e-waajib ki bina par zaruri hai ke ooska khums de. Laikin jo maal oose khums ya zakaat ka mustrhaq samahj kar diya gaya ho to zaruri nahi hai ke oos asli maal ka khums de. Haan! agar oose kuch moon’afa hasil hua ho jo sal bhar ke akhrajaat ke ba’d bach gaya ho to ooska khums ada karna zaruri hai.
1650. Agar koi shakhs aisi raqam se koi cheez khareed le jiska khums na diya gaya ho bechne waale se kahe ke “main yeh cheez oos raqam se khareed raha hoon”Agar bechne wala shi’a athna ashri ho to zaahir yeh hai ke kul maal ke muta’aliq ma’amla durust hai aur khums ka ta’lluq oos cheez se ho jaata hai jo osne oos raqam se khareedi hai (is m’amle mein) haakim-e-shar’a ki ijaazat aur dastakhat ki zarurat nahi.
1651. Agar koi shakhs koi cheez khareede aur ma’am’la tay karne ke ba’d ooski qeemat oos raqam se ada kare jiska khums na nikaala gaya ho jo ma’amla oosne kiya hai woh sahi hai aur jo raqam oosne farorh shuda ko di hai ooske khums ke liye woh mustahqeen ka makrooz hai.
1652. Agar koi shi’a athna ashari musalmaan koi aisa maal khareede jiska khums na diya gaya ho to ooska khums bechne waale ki zimmedaari hai aur khareedaar ke zimme kuch nahi.
1653. Agar koi shakhs kisi shi’a ashna ashari ko koi aisi cheez bataure atiya de jiska khums na diya gaya ho to ooske khums ki adaayegi ki zimmedaari atiya dene waale par hai aur (jis shakhs ko atiya diya gaya ho)ooske zimme kuch nahi.
1654. Agar insaan ko kisi kaafir se ya aise shakhs se jo khums dene mein a’itbaar na rakhta ho, koi maal mile to oos maal ka khums dena waajib nahi hai.
1655. Taajir, dukaandaar, kaargeer aur is kism ke dusre logo ke liye zaruri hai ke jab oonhone kaarobaar ya kaam shuru kiya ho ek saal guzar jaye to jo kuch oonke saal bhar ke akhrajaat se zayaada ho ooska khums de. Yehi hukm majaalis padhne waale zakir waghairah ka bhi hai. Chahe oose sal ke maqsus ayyaam mein hi aamdani hui ho, jabkeh ooski aamdani salana akhrajaat ka ek bada hissa ada kar rahi ho. Jo shakhs kisi kaam dhahnde se kamaayi na karta hota ke oos zariye se apne akhrajaat ada kare balkeh logo ya hukumat ki madad se ooska guzaraa ho raha ho ya oosse ittefaaqan koi nafa haasil ho jaaye to jab oose yeh nafa mile tab se ek saal guzarne ke ba’d jitni miqdaar ooske saal bhar ke akhrajaat se zayaada ho zaruri hai ke ooska khums de. Is a’itbaar se har moonaafe ke liye ek alag saal bhi qaraar de sakta hai.
1656. Saal ke dauraan jis vaqt bhi kisi ko moonafa mile woh ooska khums de sakta hai aur ooske liye yeh bhi jayez hai ke saal ke khatm hone tak ooski adaa’egi ko muakkhar kar de, Laikin agar jaanta ho ke saal ke ikhtetaam tak woh khums ada karne ke liye Shamsi saal (roman calendar)ikhtayaar kare to koi harj nahi hai.
1657. Agar kisi shakhs ko koi moonaaf’a haasil ho laikin woh saal ke dauraan mar jaaye to zaruri hai ke ooski maut tak ke akhrajaat ooske moonaafe mein se nikaal kar baaqi maanda ka khums fauran de.
1658. Agar kisi shakhs ke bagharze tejaarat khareede hue malki qeemat badh jaaye aur woh oose na beche aur oosi saal ke dauraan ooski qeemat gir jaaye to jitni miqdaar mein qeemat badhi hai ooska khums waajib nahi hai.
1659. Agar kisi shakhs ke ba gharze tejaarat khareede huye maal ki qeemat badh jaaye aur woh is uumeed par ke abhi ooski qeemat aur badhegi oos maal ko saal ke khaatme tak farokht na kare aur phir ooski qeemat gir jaaye to jis miqdaar tak qeemat badhi ho ooska khums dena ehtayaat-e-waajib ki bina par zaruri hai.
1660. Kisi shaks ne maal tejaarat ke siwa koi maal khareed kar ya isi tarah ke kisi tariqe se haasil kiya ho jiska khums woh ada kar chuka ho to agar ooski qeemat badh jaaye to oose bech de to zaruri hai ke jis qadr oos cheez ki qeemat badhi ha, Agar saal bhar ke akhrajaat ka ba’d bach jaaye to ooska khums de. Isii tarah maslan agar koi darakht khareede aur oos mein uumeed lage (bhaid khareede aur woh) bhaid moti ho jaaye to zaruri hai ke oos izaafi miqdaar ka khums nikaale.
1661. Agar koi shakhs kisi aise maal se jiska khums ada kar diya hai ya jispar abhi khums waajib nahi hua hai, iis khayaal se baagh (mein paudeh)lagaaye ke qeemat badh jaane par oonhein bech degaa to zaruri hai ke uumeedo ki aur darakhto ki nasho numa, khudru ya kaasht kiye hue paudeh, khusk shuda lakdiyaa jo kaat kar istefaada karne ke qaabil ho gayi hon aur baagh ki badhi hui qeemat ka khums de. Laikin agar ooska iraada yeh raha ho ke oon darakhto ke phal bech kar oon se nafa kamaaye ga to qeemat ki izaafi miqdaar ka khums zaruri nahi, baaqi har cheez ka khums dena zaruri hai.
1662. Agar koi shakhs baer, mushk, aur chinaar waghaira ke darakht lagaaye to zaruri hai ke har saal oonke bahdne ka khums de aur isii tarah agar oon darakhto ki shakon se nafa kamaaye jo amuman har saal kaati jaati hai agar ooski aamdani ooske saal bhar ke akhrajaat se zayaada hai to zaruri hai ke ooska khums de.
1663. Agar kisi shakhs ki aamdani ke mut’adad zariye ho, maslan apne sarmaaye se oosne shakkar bhi khareed rakhi ho aur chaawal bhi, agar oon tamaam zara’aye tejaarat ki aamdani aur akhrajaat aur tamaam raqam ka hisaab kitaab yakja ho to zaruri hai ke saal ke khaatme par jo jo kuch ooske akhrajaat se za’ed ho ooska khums ada kare. Agar ek zariye se na’feh kamaayi aur dusre zariye se nuqsaan uuthaaye to woh ek zariye ke nuqsaan ka dusre zariye ke nuqsaan se tadraak kar sakta hai. Laikin agar oos ke do mukhtalif paise ho maslan tejaarat aur zaraa’at ho ya ek aur paisa ho laikin mukhtalif cheezon ka sabab ka hisaab-o-kitaab bilkul juda ho to oon dono suuraton mein ehtayaat-e-waajib ki bina par woh ek paise ke nuqsaan ka tadraak dusre paise ke nafe se nahi kar sakta.
1664. Insaan jo akhrajaat faayeda haasil karne ke liye maslan dalaali aur baa rbardaari ke silsile mein kharch kare isi tarah aalaat aur wasa’el par jo nuqs aaye to oonhein moonafe mein se minha kar sakta hai aur ootni miqdaar ka khums ada karna waajib nahi.
1665. Kaar-o-baar ke moonaafe se jo koi shaks saal bahr mein jo kuch khuraak, libaas, ghar ke saaz-o-saamaan, makaan ki kharidi, bete ki shaadi, beti ka jahez aur ziyaarat waghairah par kharch kare oos par khums nahi hai par bashart ke aise akhrajat oos ki haisiyat se zayaada nahi ho.
1666. Jo maal insaan mannat ke kaffare par kharch kare woh salaana akhrajaat ka hissa hai. Isi tarah woh maal bhi ooske saalaana maal ka hissa hai jo woh kisi ko tohfe ya in’aam ke taur pe de basharte ooski haisiyat se zayaada na ho.
1667. Agar riwaaj iis baat ka ho ke insaan apni ladki ka jahez chand saalo mein batadreej bana de aur jahez tayyar karna ooski shaan ke khilaaf ho, chahe oosi a’itbaar se ke woh a’in vaqt par saara jahez tayyar na kar paayega aur woh saal ke dauraan oosi moonaafe se kuch jahez khareede jo ooski haisiyat se badh kar na ho aur arfi a’itbar se jahez ki itni miqdar ooske saal ke akhrajaat mein se samjhi jaaye to oospar khums dena laazim nahi hai aur agar woh jahez ooski haisiyat se badh kar ho ya ek saal ke moonaafe se dusre saal mein tayyar kiya gaya ho to oos par khums dena zaruri hai.
1668. Jo maal kisi shakhs ne ziyaarat_Baitullah (Hajj) aur dusri ziyaarat ke safar mein kharch kiya ho woh oos saal ke akhrajaat mein shumaar hota hai jis saal mein kharch kiya jaaye agar ooska safar saal se zayaada lamba ho jaaye to jo juch woh dusre saal mein kharch karega ooska khums dena zaruri hai.
1669. Jo shakhs kisi paise ya tejaarat se moonafa haasil kare agar ooske paas koi aur maal bhi ho jis par khums waajib nahi ho to woh apne saal bhar ke akhrajaat ka hisaab faqt apne moonaafe ko madde nazar rakhte hue kar sakta hai.
1670. Jo saamaan kisi shakhs ne saal bhar ist’emaal karne ke liye apne moonaafe se kahreeda ho agar saal ke aakhir mein oos mein se kuch bach jaaye to zaruri hai ke ooska khums de aur agar khums oos ki qeemat ki suurat mein dena chahe aur jab woh saamaan khareeda tha ooske muqaabale mein ooski qeemat badh gayi ho to zaruri hai ke ek saal ke khaatme par jo qeemat ho ooska hisaab lagaayega.
1671. Koi shakhs khums dene se pahle apne moonaafe mein se ghar ya ist’emaal ke liye saamaan khareede agar ooski zarurat moonaaf’a haasil hone waale saal ke ba’d khatm ho jaaye to zaruri nahi hai ke ooska khums de aur agar dauraaan-e-saal ooski zarurat khatm ho jaaye laikin woh saamaan oon cheezon mein se ho jo amuman aa’enda saalo mein ist’emaal ke liye rakhi jaati hain jaise sardi aur garmi ke kapde to oonpar khums nahi hota. Is suurat ke al’awa dauraan-e-saal agar oos saamaan ki zarurat khatm ho jaaye to ehtayaat-e-waajib yeh hai ke ooska khums de. Aurat ke liye jin zevraat ko bataure zeenat ist’emaal karne ka zamaana guzar jaaye to oos par bhi khums nahi hai.
1672. Agar kisi shakhs koi kisi saal mein moonafa na ho to woh oos saal ke akhrajat ko aa’enda saal ke moonafe se minha nahi kar sakta.
1673. Agar kisi shakhs ko saal ke shuru mein moonaaf’a na ho aur woh apne sarmaaye se kharch oothaaye aur saal ke khatm hone se pahle oose moonaaf’a ho jaaye to oosne jo kuch bhi sarmaaye mein se kharch kiya hai oose moonaafe se minha kar sakta hai.
1674. Agar sarmaaya ka kuch hissa tejaarat waghairah mein doob jaaye to jis qadr sarmaaya dooba ho insaan ootni miqdaar mein oos saal ke moonaafe mein se minha kar sakta hai.
1675. Agar kisi ke maal mein sarmaaye ke a’lawa koi aur cheez bhi zaaya ho jaaye, agar oose oosi saal mein oos cheez ki zarurat pad jaaye to woh oos saal ke dauraan apne moonaafe se muhhayya kar sakta hai, oos par khums nahi hai.
1676. Agar kisi shakhs ko saaal bhar koi moonaaf’a na ho aur woh apne akhrajaat karz lekar poora karne ke liye karz le aur saal kahtm hone se pahle moonafa kamaaye to apne karze ki raqam os moonaafe se minha kar sakta hai. Isii tarah pehli suurat mein woh oos karze ko apne sal ke moonaafe se ada kar sakta hai aur moonaafe ki oos miqdaar se khums ka koi ta’lluq nahi.
1677. Agar koi shakhs maal bhadaane ki garz se ya aise amlaak khareedne ke liye jiski oose zarurat na ho karz le to agar woh oos saal ke moonaafe mein se khums ada kiyr baghair woh karza ada karde to saal guzarne par zaruri hai ke oos cheez ka khums ada kare, siwaaye is suurat mein ke karze mein liya hua maal oos ke maal se khareedi gayi cheez ke dauraan hi khatm ho jaaye.
1678. Insaan har oos cheez ka jis par khums waajib ho chuka ho oosi cheez ki shakl mein khums de sakta hai aur agar chahe to jitna khums oospar waajib ho ooski qeemat ke barabar raqam bhi de sakta hai. Laikin agar kisi dusri jins ki suurat mein jis par khums waajib na ho dena chahe to mehel ishkaal hai bajuz iske ke aisa karna haakim-e-shar’a ki ijaazat se ho .
1679. Jis shakhs ke maal par khums waajibul ada ho aur saal guzar gaya ho laikin oosne khums na ada kiya ho to woh oos maal mein tasarruf nahi kar sakta.
1680. Jo shakhs ko khums ada karna ho woh yeh nahi kar sakta hai ke khums ko apne zimme le ya’ni apne aap ko khums ke mustaheqeen ka makrooz tasawwur kare aur saara maal ist’emaal karta rahe aur agar ist’emaal kare aur agar woh maal talaf ho jaaye to zaruri hai ooska khums de.
1681. Jis shakhs ko khums ada karna ho agar woh haakim-e-shar’a se mufaehamat karke khums ko apne zimme le le to maal ist’emaal kar sakta hai aur mufaehamat ke ba’d jo moonaaf’a osse haasil ho woh ooska apna maal hai. Albatta zaruri hai ke apna khums wala karza batadreej tarah ada kare ke oose khums ada karne mein sakhti kaha jaa sake.
1682. Jo shakhs kaar-o-baar mein mein kisi dusre ke saath shareeq ho agar woh apna moonaaafe par khums de de aur ooska hisse daar na de aur aa’enda saal woh hisse daar oos maal ko jiska khums oosne nahi diya hai saanjhe mein sarmaaye ke taur par pesh kare to woh shakhs(jisne khums diya ho) agar shi’a ashna ashari musalmaan ho to oos maal ko ist’emaal kar sakta hai.
1683. Agar naa baaligh bachche ko koi moonaaf’a hasil ho chahe tohfo ki suurat mein hi ho aur dauraan-e-saal woh bachche ki zaruriyzat mein ist’emaal na ho to oos par khums dena hoga aur ooske wali par waajib hai ke ooska khums de aur agar wali khums na de to baaligh hone ke ba’d ke woh khud ooska khums de.
1684. Jis shakhs koi kisi dusre shakhs se koi maal mile aur oose shak ho ke (maal dene waale) dusre shakhs ne ooska khums diya hai ya nahi to (woh maal haasil karne wala shakhs) oos maal mein tassarruf kar sakta hai. Balkeh agar yaqeen bhi ho ke oos dusre shakhs ne khums nahi bhi diya tab bhi agar woh shi’a ashna ashari musalmaan ho to oos maal mein tassarruf kar sakta hai.
1685. Agar koi shakhs saal ke moonaafe se koi aisi cheez khareede jo ooski saal bhar ki zaruriyaat aur akhrajaat mein shumaar na ho to oospar waajib hai ke os saal ke khaateme par ooska khums de aur agar khums na de aur oos cheez ki qeemat badh jaaye to laazim hai ke maujooda qeemat par khums de.
1686. Agar koi shakhs koi cheez khareede aise mal se jiska khums nahi diya gaya ho aur oos par ek saal guzar chuka ho, ooski qeemat ada kare aur phir ooski qeemat badh jaaye, maslan kheti baadi ke liye zameen khareedi ho to zaruri hai ki qeemat khareed par khums de maslan agar bechne waale ko woh raqam di ho jis par khums diya na gaya ho aur oose kaha gaya ho ke main yeh jaayedaad oos raqam se khareedta hoon to zaruri hai ke oos jaa’yedaad ki maujooda qeemat par khums de.
1687. Jis shakhs ne shuru se(ya’ni jab se oospar khums ki adaae’gi waajib hui) ya chand saalo se khums na diya ho agar oosne apne kaarobaar ke moonaafe se koi aisi cheez khareedi ho jiski oose zarurat na ho aur oose kaarobaar shuru kiye hue ya agar kaaro baar na ho to moonaaf’a kamaaye ek saal guzar gaya ho to zaruri hai ke ooska khums de aur agar oosne ghar ka saaaz o samaan aur zarurat ki cheez apni haisiyat ke mutabiq khareedi ho aur jaanta ho ke oos ne woh cheez saal ke dauraan oos moonaafe se khareedi hai jis saal mein oose moonaaf’a hua hai aur oosi saal mein oonhein ist’emaal bhi kar liya hai to oon par khums dena laazim nahi. Laikin agar oose ma’loom na ho ke ehtayaat-e-waajib ki bina par zaruri hai ke haakim-e-shar’aa se ehtimaali nisbat par mafaehamaat kare ya’ni maslan 50 fisad par khums waajib ho gaya to zaruri hai ke oos ka 50 fisad khums ke taur par de.
No comments:
Post a Comment