1892. Fitrah ehtayaat-e-waajib ki bina par faqt oon shia ashna ashari fuq’ra ko dena zaruri hai jo oon shara’et par poore utarte ho jin ka zikr zakaat ke mustaqeen mein ho chuka hai aur agar shahar mein shia ashna ashari fuq’ra na mile to dusre musalmaan fuq’ra ko fitrah de sakta hai. Laikin zaruri hai ke kisi bhi suurat mein “naasibi” ko na diya jaaye.
1893. Agar koi shia bachcha faqeer ho to insaan yeh kar sakta hai ke fitrah oospar kharch kare ya ooske sarparast ko de kar oose bachche ki milqiyat qarrar de.
1894. Jis faqeer ko fitrah diya jaaye to zaruri nahi ke woh a’dil ho laikin ehtayaat-e-waajib yeh hai ki sharaabi, benamaazi aur jo khullam khulla goonaah karta ho oose fitrah na diya jaaye.
1895. Jo shakhs fitrah na jayez kaamo mein kharch karta ho to oose fitrah na diya jaaye.
1896. Ehtayaat-e-mustahab yeh hai keh ek faqeer ko ek sa’a se kam fitrah na diya jaaye. Magar oos suurat mein diya jaa sakta hai ke sab maujooda fuq’ra ko na pohoonch sake. Albatta ek sa’a se zyaada dene mein koi ishkaal nahi hai.
1897. Jab kisi jins ki qeemat oos jins ki ma’mooli qism se dogooni ho, maslan kisi gehoon ki qeemat kisi ma’mooli qism ke gehoon se dogooni ho to agar koi shakhs oos (badhiya jins) ka aadha sa’a bataur fitrah de to yeh kaafi nahi hai balkeh agar woh aadhe sa’a fitrah ki niyyat se bhi de to woh kaafi nahi hai.
1898. Insaan aadhe sa’a maslan ek jins ka gehoon aur aadha sa’a kisi dusri jins ka maslan jow, bataure fitrah nahi de sakta balkeh agar yeh aadha aadha sa’a fitrah ki qeemat ki niyyat se de to bhi kaafi nahi hai.
1899. Insaan ke liye mustahab hai keh zakaat dene mein apne rishtedaaro aur hamsaayo ko dusre logo par tarjih de. Moonaasib hai keh ahle ilm-o-fazl aur deendaar logo ko bhi dasro se tarjih de.
1900. Agar insaan yeh khayaal karte hue ke ek shakhs faqeer hai oose fitrah de aur ba’d mein ma’loom ho ke woh faqeer na tha to agar oose jo maal faqeer ko diya tha woh khatm na ho gaya ho to zaruri hai ke waapas le le aur mustaheq ko de de aur agar waapas na le sakta ho to zaruri hai ke khud apne maal se fitrah ka aewaz de aur agar woh maal khatm ho gaya ho laikin lene waale ko yeh ilm ho ke jo kuch bhi oosne liya hai woh fitrah hai to zaruri hai ke ooska aewaz de aur agar oose yeh ilm na ho to aewaz dena oospar waajib nahi aur zaruri hai ke fitarh dene wala khud fitrah ka aewaz de.
1901. Agar koi shakhs kahe ke main faqeer hoon to oose fitrah nahi diya jaa sakta ba juz is suurat ke keh kisi ke kahne se itminaan ho jaaye ya oose ilm ho ke woh pahle faqeer tha.
No comments:
Post a Comment