2457. Jo mard apni biwi ko talaaq de oos ke liye zaruri hai keh baaligh aur a’aqil ho. Laikin das saal ka bachcha apni biwi ko talaaq de to oos ke baare mein ehtayaat ka khayaal rakhen aur isii tarah zaruri hai keh mard apne ikhtayaar se talaaq de. Aur agar oose apni biwi ko talaaq dene par majboor kiya jaaye to talaaq baatil hai. Aur yeh bhi zaruri hai keh woh shakhs talaaq ki niyyat rakhta ho lehaaza agar woh maslan mazaaq mein ya nashe ki haalat mein talaaq ka seghaa kahe to talaaq sahi nahin hai.
2458. Zaruri hai keh aurat talaaq ke vaqt haiz ya nafaas se paak ho aur oos ke shauhar ne oos paaki ke dauraan oos se hambistari na ki ho aur iin do sharton ki tafseel aayenda massle mein bayaan ki jayegi.
2459. Aurat ko haiz ya nafaas ki haalat mein teen suuraton mein talaaq dena sahi hai:
(1) Shauhar ne nikaah ke b’ad oos se hambistari na ki ho.
(2) M’aloom ho keh woh hamlaa hai aur agar yeh baat m’aloom na ho aur shauhar oose haiz ki haalat mein talaaq de de aur b’a mein shauhar ko pata chale keh woh hamlaa thhi to woh talaaq baatil hai aur ehtayaat ka khayaal rakhna beharhaal baehtar hai. Agarche dobarah talaaq dene se ho.
(3) Mard ghair haziri ya kisi bhi aur wajah se agarche apni biwi ki makhfi rakhne ke sabab yeh m’aloom na kar sakta ho keh woh haiz ya nafaas se paak hai ya nahin. Laikin iis suurat mein ehtayaat-e-waajib ki bina par zaruri hai keh mard intezaar kare takeh biwi se juda hone ke b’ad kam az kam ek mahinaa guzar jaaye oos ke b’ad oose talaaq de.
2460. Agar koi shakhs aurat ko haiz se paak samjhe aur oose talaaq de de aur b’ad mein pata chale keh woh haiz ki haalat mein thhi to oos ki talaaq batil hai magar darfarz mazkura agar shauhar oose haiz ki haalat mein samjhe aur talaaq de de aur b’ad mein m’aloom ho keh paak thhi to oos ki talaaq sahi hai.
2461. Jis shakhs ko ilm ho keh oos ki biwi haiz ya nafaas ki haalat mein hai agar woh biwi se juda ho jaaye massalan safar ikhtayaar kare aur oose talaaq dena chaahe to oose chahiye keh itnii muddat sabr kare jis mein oose yaqeen ho jaaye keh woh aurat haiz ya nafaas se paak ho gayee hai aur jab woh yeh jaan le keh aurat paak hai oose talaaq de sakta hai. Agar oose shak ho tab bhi yahi hukm hai iis laikin suurat mein gha’eb shakhs ki talaaq ke baare mein massla 2459 mein jo shara’et bayaan huyee hain oon ka khayaal rakhe.
2462. Jo shakhs apni biwi se juda ho agar woh oose talaaq dena chaahe to agar woh m’aloom kar sakta ho keh oos ki biwi haiz ya nafaas ki haalat mein hai ya nahin to agarche aurat ki a’adat ya oon dusri nishaaniyon ko jo shar’a mein mo’yyin hain dekhte huye oose talaaq de aur b’ad mein m’loom ho keh woh haiz ya nafaas ki haalat mein thhi to oos kit alaaq sahi nahin hai.
2463. Agar koi shakhs apni biwi se khawah haiz ki haalat mein ho ya paak ho hambistari kare aur phir oose talaaq dena chaahe to zaruri hai keh sabr kare hatta keh oose dobarah haiz aa jaaye aur phir woh paak ho jaaye. Lakin agar aisii suurat ko hambistari ke b’ad talaaq di jaaye jis ki umr nau saala se kam ho ya m’aloom ho keh woh haamla hai to oos mein koi ishkaal nahin aur agar aurat yaesa ho tab bhi yahi hukm hai. (yaesa ka matlab massla 2407 mein guzar chuuka hai).
2464. Agar koi shakhs aisii aurat se hambistari kare jo haiz aur nafaas se paak ho aur isii paak ki haalat mein oose talaaq de de aur b’ad mein oose m’aloom ho keh woh talaaq den eke vaqt haamla thhi to talaaq batil hai aur ehtayaat ka khayaal rakhna zaruri hai. Chaahe talaaq ki tajdeed ke zariye kyoon na ho.
2465. Agar koi shakhs aisii aurat se hambistari kare jo haiz aur nafaas se paak ho aur phir woh oose se juda ho jaaye maslan safar ikhtayaar kare lehaaza agar woh chaahe keh safar ke dauraan oose talaaq de aur oos ki paaki ya naapaaki ke baare mein na jaan sakta ho to zaruri hai keh itnii muddat sabr kare keh aurat ko oos paaki ke b’ad haiz aaye aur woh dobaarah paak ho jaaye. Aur ehtayaat-e-waajib yeh hai keh woh muddat ek mahine se kam na ho. Aur jo kuchh kaha gaya hai oos ki ra’aiyat rakhte huye talaaq de de iis ke b’ad m’aloom ho jaaye keh talaaq oos pahli paaki mein waq’e hai to koi ishkaal nahin.
2466. Agar koi mard apni biwi ko talaaq dena chahta ho jise paidayish taur par ya kisi beemaari ya bachche ko dhoodh pilaane ki wajah se ya dawa iste’maal karne ya kisi bhi wajah se haiz na aata ho aur oos umr ki dusri auraton ko haiz aata ho to zaruri hai keh jab oos ne aisii aurat se jama’ kiya ho oos vaqt oose teen mahine tak oos se jama’ na kare aur b’ad mein oose talaaq de de.
2467. Zaruri hai keh talaaq ka segha sahi a’rbi mein lafz “Taaleqoon” ke sathh padha jaaye aur do a’adil mard oose suoone. Agar shauhar khud talaaq ka segha padhna chaahe aur misaal ke taur par oos ki biwi ka naam fatema ho to kahe: “Zaujatu muwak keli fatematu taaleqoon” ya oose mukhatib hokar kahe: “Ante taaleqoon” Aur agar mard a’rbi mein talaaq ka segha na padh sakta ho aur vakeel bhi na bana sake to woh jis zabaan mein chaahe har oos lafz ke zariye talaaq de sakta hai jo a’rbi lafz ke ham maane hai.
2468. Jis aurat se muta’ kiya gaya ho (maslan ek saal ya ek mahine ke liye oos se nikaah kiya gaya ho) oose talaaq dene ka koi sawaal nahin. Iis ka aazaad hona oos baat par moonhasar hai keh muta’ ki muddat khatm ho jaaye ya mard oose muddat bakhsh de maslan kahe: “Main ne muddat tujhe bakhsh di” aur kisi ko iis par gawaah qarrar dena aur oos aurat ka haiz se paak hona laazim nahin.
No comments:
Post a Comment