2330. Nikaah ki chand shartein hain (jo zeil mein darj ki jaati hain):
1. Ehtayaat-e-waajib ki bina par nikaah ka segha a’rbi mein padhaa jaaye aur agar khud mard aur aurat segha a’rbi mein na pdha sakte hon to a’rbi ke a’lawa kisi dusri zabaan mein padh sakte hain aur kisi shakhs ko vakeel banana laazim nahin hai. Albatta oonhein chahiye keh woh alfaaz kahen jo “zawwajto” aur “qabalto” ka mafhuum ada kar saken.
2. Mard aur aurat ya iin ke vakeel jo keh seghaa padh rahe hon woh “qasde insha’” rakhte huye y’ani agar khud mard aur aurat segha padh rahe hon to aurat ka “zawwajatoka nafsi” kahna iis niyyat se ho keh khud ko oos ki biwi qarra de aur mard ka “qabiltut tazweeja” kahna iis niyyat se ho keh woh oos ka apni biwi banna qabool kare. Aur agar mard aur aurat ke vakeel segha padh rahe hon to “zawwajto” aur “qabilto” kahne se oon ki niyyat yeh ho keh woh mard aur aurat jinho ne oonhein vakeel banaya hai ek dusre ke miyan biwi ban jaayen.
3. Jo shakhssegha padh raha ho zaruri hai keh woh a’aqil ho aur agar apbe liye padh raha ho to baaligh hona bhi zaruri hai. Balkeh ehtayaat-e-waajib ki bina par nabaaliigh mammayez bachche kad dusre ka nikaah padhna kaafi nahin hai. Aur agar padh de to talaaq dena zaruri hai ya dobarah nikaah padhen.
4. Agar aurat aurmard ke vakeel ya oon ke sarparast seghaa padh rahe hon to woh nikaah ke vaqt aurat aur mard ko mo’yyin kar len. Maslan oon ke naam len ya onn ki taraf ishara Karen. Lehaaza jis shakhs ki kayee ladkiyaan hon agar woh kisi mard se kahe “zawwajtoka ihde banati” y’ani main ne apni biwion mein se ek ko tumhaari biwi banaya aur woh mard kahe “qabilto” y’ani main ne qabool kiya to chu nakeh nikaah karte vaqt ladki ko mo’yyin nahin kiya gaya iis liye nikaah batil hai.
5. Aurat aur mard azdoaaj par raazi hon. Han! Agar bazaahir napasandgi ka izhaar Karen aur m’aloom ho keh dik se raazi hain to nikah sahi hai.
2331. Agar nikaah mein ek harf ya zayada ghalat padhe jayen jis se maane na badle to nikaah sahi hai.
2332. Woh shakhs jo nikaah ka segha padh raha ho agar khawah ajmaali taur par nikaah ke maane jaanta ho aur oos ke maane ko haqiqi shakl dena chahta ho to nikaah sahi hai. Yeh laazim nahin keh woh tafseel ke sathh seghe ke maane jaanta ho. Maslan yeh jaanta ho keh a’rbi zabaan ke lehaaz se fa’el ya fa’al kaoon sa hai.
2333. Agar aurat ka nikaah kisi mard se oon ki ijaazat ke baghair kar diya jaaye aur b’ad mein aurat aur mard oos nikaah ki ijaazat de den to nikaah sahi hai. Ijaazat ke liye koi aisii baat kahen ya koi aisaa kaam anjaam den jo razamandi par walalat kare kaafi hai.
2334. Agar aurat aur mard dono ko ya oon mein se kisi ek ko azdoaaj par majboor kiya jaaye aur nikaah padhe jaane ke b’ad guzishta massle mein kahe gaye tariqe par woh ijaazat de den to nikaah sahi hai laikin behtar yeh hai keh dobarah nikaah padha jaaye.
2335. Baap aur dada apne naabaligh ladke ya ladki (pote ya poti) ya deewaane farzand ka jo deewangi ki haalat mein baaligh hua ho dasron se nikaah kar sakte hain aur jab woh bachcha baaligh ho jaaye ya deewana a’aqil ho jaaye to oonh one oos ka jo nikaah kiya ho agar oos mein koi kharabi ho to oonhein oos nikaah ko barqarrar rakahne ya khatm karne ka ikhtayaar hai. Aur agar koi kharabi na ho aur nabaaligh ladke ya ladki mein se koi ek apne oos nikaah ko mansuukh kare to ehtayaat-e-waajib ki bina par zaruri hai keh talaaq de ya dobarah nikaah padhe.
2336. Jo ladki sin bulugh kop pohoonch chuuki ho aur rashida ho y’ani apna bura bhala samajh sakti ho agar woh shaadi karna chaahe aur koonwaari ho aur apni zindagi ke umoor khud mukhtaari se anjaam na deti ho to oose chahiye keh apne baap ya dada oose ijaazat le. Balkeh ehtayaat-e-waajib ki bina par yahi hukm oos ke liye bhi hai jo khud mukhtaari se apni zindagi ke kaamon ko anjaam deti ho, albatta maa aur bhayee se ijaazat lena laazim nahin.
2337. Agar ladki koonwaari na ho ya koonwaari ho laikin baap aur dada oos mard ke sathh oose shaadi karne ke liye ijaazat na dete hon jo a’rfan wa shar’an oos ka hampala ho ya baap aur dada beti ke shaadi ke m’amle mein kisi tarah shareek hone ke liye raazi na ho ya deewangi ya iis jaisii dusri wajah se ijaazat dene ki ehliyat na rakhte hon to oon tamaam suuraton mein oon se ijaazat lena laazim nahin hai. Isii tarah oon ke maujood na hone ya kisi dusri wajah se ijaazat lena mumkin na ho aur ladki ka shaadi karna behad zaruri ho to baap aur dada se ijaazat lena laazim nahin hai.
2338. Agar baap ya dada apne nabaaligh ladke (ya pote) kli shaadi kar den to ladke (ya pote) ko chahiye keh baaligh hone ke b’ad oos aurat ka kharch de balkeh baaligh hone se pahle bhi jab oos ki umr itnii ho jaaye keh woh oos ladki se lazzat uuthhane ki qabiliyat rakhta ho aur ladki bhi iis qadr chhoti na ho keh shauhar oos se lazzat na uuthha sake to biwi ke kharch ka zimme daar ladka hai. Iis suurat ke a’lawa biwi ka kharcha mard ke aimme nahin.
2339. Agar baap ya dada apne nabaaligh ladke (ya pote) ki shaadi kar den to agar ladke ke paas nikaah ke vaqt koi maal na ho to baap ya dada ko chahiye keh oos auurat ka mehar de. Aur yahi hukm hai agar ladke (ya pote) ke paas koi maal ho laikin baap ya dada ne mehar ada karne ki zamaanat di ho. Iin do suuraton ke a’lawa agar oos ka mehar mehar ul missal se zayada na ho ya kisi masslahaty ki bina par oos ladki ka mehar mehar ul missal se zayada ho to baap ya dada bete (ya pote) ke maal se mehar ada kar sakte hain warna bete (ya pote) ke maal se mehar ul missal se zayada mehar nahin de sakte magar yeh keh bachcha baaligh hone ke b’ad oon ke oos kaam ko qabool kare.
No comments:
Post a Comment