1724. Zaruri hai ke khums do hisso mein taqseem kiya jaaye. Ooska ek hissa sa’daat ka hai aur zaruri hai ke kisi faqeer sayyed ya yateem sayyed ya aise sayyed ko diya jaye jo safar mein laa chaar ho gaya ho aur dasra hissa Imaam(a. s. s) ka hai jo zaruri hai ke maujooda zamaane mein jaa’me shara’e mujtahid ko diya jaaye ya aise kaamo jiski woh mujtahid ijaazat de kharch kiya jaaye aur ehtayaat-e-laazim hai ke woh marja’e a’lam ho aur masslehato se aagaah ho.
1725. Jis yateem sayyed ko khums diya jaaye zaruri hai ke woh faqeer bhi ho laikin jo safar mein la chaar ho jaaye woh khawah apne watan mein faqeer na ho tab bhi oose khums diya jaa sakta hai.
1726. Jo sayyed safar mein na chaar ho gaya ho agar oos ka safar goonaah ka safar ho to ehtayaat-e-waajib ki bina par zaruri hai ke oose khums na diya jaaye.
1727. Jo sayyed a’dil na ho oose khums diya jaa sakta hai laikin jo sayyed ishna ashari na ho zaruri hai oose khums na diya jaaye.
1728. Jo shakhs khums ko goonaah ke kaam mein ist’emaal kare oose khums nahi diya jaa sakta balkeh oose khums dene mein oose goonaah karne mein madad hoti ho to ehtayaat-e-waajib yeh hai ke oose khums na diya jaaye chahe woh oose goonaah mein ist’emaal nab hi kare. Isii tarah ehtayaat-e-waajib yeh hai keh oos sayyed ko bhi khums na diya jaye jo sharaab peeta ho ya namaaz na padhtaa ho ya a’lania goonaah karta ho.
1729. Jo shakhs kahe ki main sayyed hoon oose oos vaqt tak khums na diya jaaye jab tak do a’adil ashkhaas ooske sayyed hone ki tasdeeq na kar de ya insaan ko kisi bhi tariqe se yaqeen ya itminaan ho jaaye ke woh sayyed hai.
1730. Koi shakhs apne shahar mein masshhoor ho ke woh sayyed hai, agar insaan ko is ke barkhilaaf baat par yaqeen ya itminaan na ho to oose khums diya jaa sakta hai.
1731. Agar kisi shakhs ki biwi saydaani ho to ehtayaat-e-waajib ki bina par zaruri hai ke shauhar oose oos maqsad ke liye khums na de ke woh oose apne zaati ist’emaal mein le aaye laikin agar dusre logo ki kafaliyat oos aurat pe agar waajib ho aur woh oon akhrajaat ki ada’egi se qaasir ho to insaan ke liye jayez hai ke woh apni biwi ko khums de takeh woh zere kafaliyat logo par kharcha kare isi tarah oos aurat ko apne ghair waajib akhrajaat par sirf karne ke liye khums dene ka bhi yahi hukm hai.
1732. Agar insaan par kisi sayyed ke ya aisi saydaani ke akhrajaat waajib ho jo ooski biwi na ho to ehtayaat-e-waajib ki bina par woh oos sayyed ya saydaani ki khuraaq aur poshaak ke akhrajaat aur baaqi waajib akhrajaat apne khums se ada nahi kar sakta. Han! Agar woh oos sayyed ya saydaani ko khums ki kuchh raqam is maqsad se de ke woh waajib akhrajaat ke a’lawa oose dusri zaruriyaat par kharch kare to khums dene mein koi harj nahi hai.
1733. Agar kisi faqeer sayyed ke akhrajaat kisi dusre shakhs par waajib ho aur woh shakhs oos sayyed ke akhrajaat bardaasht na kar sakta ho ya istetaa’at rakhta ho laikin na deta ho to oos sayyed ko khums diya jaa sakta hai.
1734. Ehtayaat-e-waajib yeh hai ke kisi ek faqeer sayyed ko ooske ek saal ke akharajaat se zyaada khums na diya jaaye.
1735. Agar kisi shakhs ke shahar main koi mustaheq na ho to khums ko dusre shahar le jaa sakta hai balkeh agar khums ki ada’eegi mein sakhti na samjhi jaaye to mustaheq ke hote hue bhi dusre shahar le jaa sakta hai. Laikin har suurat mein agar khums talf ho jaaye to talf shuda miqdaar ka zaamin hai chaahe ooski hifaazat mein kotaahi na ki ho aur khums dusri jagah le jaane ke akhrajaat bhi oos khums mein se nahi le sakta.
1736. Agar koi shakhs Haakim-e-shar’a ya ooske wakil ki waqalat mein khums ki raqam wasool kare to woh badi zimme ho jaata hai aur agar oon do mein se kisi ek ki ijaazat se dusre shahar le jaaye aur baghair kotahi ke talf ho jaaye to woh zaamin nahi.
1737. Yeh jaayez nahi hai keh kisi cheez ki qeemat ooske asl qeemat se zyaada lagakar oose bataure khums diya jaaye aur jaisa ki massla no. 1756 mein batayagaya hai ke kisi dusri jins ki shakl mein khums ada karna mutlaqan mehle ishkaal hai. Siwaaye is ke ke Haakim-e-shar’a ya oos ke vaqeel ki jaazat ho.
1738. Jo shakhs ko khums ke mustaheq shakhs se kuch lena ho aur woh chaahta ho ke apna karza khums ki raqam se minha kar le too ehtayaat-e-waajib ki bina par zaruri hai ke ya to haakim-e-shar’aa se ijaazat le ya khums oos mustaheq ko de aur ba’d mein mustaheq shakhs oose woh maal karze ki adae’egi ke taur par lauta de aur woh yeh bhi kar sakta hai keh khums ke mustaheq shakhs ki ijaazat se ooska vaqeel bankar khud ooski taraf se khums le le aur oose apna karza chuka le.
1739. Maalik, khums ke mustaheq shakhs se yeh shart nahi kar sakta ke woh khums lene ke ba’d oose waapas lauta de.
No comments:
Post a Comment