1843. Zaruri hai ke insaan gehoon aur jow ko bhoose se alag karne ke mauqe par aur khjoor aur angoor ke khusk hone ke vaqt zakaat faqeer ko de de ya apne maal se alaiheda kar de, zaruri hai ke sone, chaandi, gaaye, bhed aur oont ki zakaat 11 mahine khatm hone ke ba’d faqeer ko de ya apne maal se alaiheda kar de.
1844. Zakaat alaiheda karne ke ba’d ek shakhs ke liye laazim nahi hai ke oose fauran mustaheq shakhs ko de de aur agar kisi a’qli maqsad se oos mein taakhiir kare to koi harj nahi hai.
1845. Jo shakhs zakaat kisi mustaheq shakhs ko pohooncha sakta ho aur agar woh oose zakaat na pohoonchaye aur ooske kotahi baratne ki wajah se maal-e-zakaat talf ho jaaye to zaruri hai ke ooska aewaz de.
1846. Jo shakhs zakaat kisi mustaheq shakhs ko pohooncha sakta ho aur agar woh oose zakaat na pohoonchaye aur maal-e-zakaat hifaazat karne ke bawajood talf ho jaaye to zakaat ada karne mein taakhiir ki koi sahi wajah na ho to zaruri hai ke ooska aewaz de laikin aur taakiir karne ki koi sahi wajah thi maslan ek khaas faqeer ooski nazar mein tha ya thoda thoda karke fuq’raa ko dena chahta tha to ehtayaat-e-waajib ki bina par ooska zaamin hai.
1847. Agar koi shakhs zakat (ain oosi) maal se juda kar de to woh baaqi maan’da maal mein tasarruf kar sakta hai aur agar woh zakaat apne kisi dusre maal se juda kar de to oos poore maal mein tasarruf kar sakta hai.
1848. Insaan ne jo maal zakaat ke taur par alaiheda kiya ho oose apne liye uutha kar oos jagah dusri cheez nahi rakh sakta.
1849. Agar oos maal-e-zakaat se jo kisi na alaiheda kar diya ho koi moonfa’at haasil ho maslan jo bhed bataure zakaat alaiheda ki gayi ho woh bachcha jane to woh moonfa’at ki zakaat ka hukm rakhti hai.
1850. Jab koi shakhs maal-e-zakaat alag kar raha ho agar oos vaqt koi mustaheq maujood ho to behtar hai ke zakaat oose dede bajuz is suurat ke koi aisa shakhs ooski nazar mein ho jise zakaat dena kisi wajah se behtar ho.
1851. Agar koi shakhs Haakim-e-shar’aa ki ijaazat ke baghair oos maal se kaar-o-baar karle jo oosne zakaat ke liye alaiheda kar diya ho aur oos mein oose khasaara ho jaaye to woh zakaat mein koi kami nahi kar sakta laikin agar moonafa ho to zaruri hai ke musaheq ko de de.
1852. Agar koi shakhs oos se pahle ke oos par zakaat oos cheez par waajib ho koi cheez bataure zakaat faqeer ko de de woh zakaat mein shumaar nahi hogi aur agar oospar zakaat waajib hone ke ba’d woh cheez jo oosne faqeer ko di thi talf na hui ho aur faqeer abhi tak faqeeri mein mubtela ho to zakaat dene wala oos cheez ko jo oosne faqeer ko di thi zakaat mein shumaar kar sakta hai.
1853. Agar faqeer jaante hue ke zakaat ek shakhs pe waajib nahi hui hai oose koi cheez bataure zakaat le le aur woh cheez faqeer ki tehweel mein talf ho jaaye to faqeer ooska zimmedaar hai aur jab zakaat oos shakhs par waajib ho jaaye aur faqeer oos vaqt tak tandrust ho to jo cheez oos shakhs ne oos faqeer ko di thi ooska aewaz zakaat mein shumaar kar sakta hai.
1854. Agar koi faqeer yeh na jaanta ho ke zakaat ek shakhs par waajib hui hai ya nahi hui hai aur oosse koi cheez batuare zakaat le le aur woh cheez faqeer ki tehweel mein talf ho jaaye to faqeer zimmedaar nahi hai aur dene wala shakhs oos cheez ko zakaat mein shumaar nahi kar sakta hai.
1855. Mustahab hai ke gaaye, bhed aur oont ki zakaat aabroomand fuqr’aa ko di jaaye aur zakaat denemein apne rishtedaaro aur aur dasro par ahle ilm par beilm logo par aur jo log haath na phelaate ho oon ko magnto par tarjih di jaaye. Haan! yeh mumkin hai kisi faqeer ko kis wajah se zakaat dena behtar ho.
1856. Behtar hai ke zakaat a’laania di jaaye aur mustahab hai ke sadqa poshida taur par diya jaaye.
1857. Jo shakhs zakaat dena chahta ho agar ooske shahar mein koi mustaheq na ho aur woh zakaat ooske liye kisi aur mo’yyin mad mein bhi sirf na ho sakta ho to woh oose kisi dusre shahar le jaa sakta hai aur is suurat mein agar oosne hifaazat mein kotaahi na ki aur ooska maal talf ho gaya to zaamin nahi hai. Woh yeh bhi kar sakta hai ke Haakim-e-shar’aa se waqaalat le le aur oos maal ko Haakim-e-shar’a ki waqalat mein wasool kare aur phir oose kisi shahar mein moontaqil kare. Is suurat mein woh talf ka zimmedaar bhi na hoga aur moontaqil karne ki ujrat bhi zakaat mein se le sakta hai.
1858. Agar zakaat dene waale ko apne shahar mein koi mustaheq mil jaaye tab bhi woh maal-e-zakaat dusre shahar mein le jaa sakta hai laikin zaruri hai ke oos shahar mein le jaane ke akhrajaat khud bardaasht kare aur agar maal-e-zakaat talf ho jaaye to woh khud zimmedaar hai bajuz is suurat mein ke maal-e-zakaat Haakim-e-shar’a ke hukm se le gaya ho.
1859. Jo shakhs gehoon, jow, kismish aur khajoor bataure zakaat de raha ho, oon ajnaas ki naap taul ki ooski zimmedaari hai.
1860. Insaan ke liye makruh hai ke mustaheq se darkhaast kare ke jo zakaat oosne oose se li hai osi ke haath farokht kar de laikin agar mustaheq na jo cheez bataure zakaat li hai pohoonchaana chaahe to jab oosk qeemat tay ho jaayeto jis shakhs ne mustaheq ko zakaat di ho oos cheez ko khareedne ke liye dasro se oska haqfaa’eq hai.
1861. Agar kisi shakhs ko shak ho ke jo zakaat oos par waajib hui thhi woh oosne di hai ya nahi aur jis maal mein zakaat waajib hui thi woh bhi maujood ho to zaruri hai ke zakaat de khawaha oos cheez ka shak guzishta saalo ki zakaat ke mutta’liq hi kyoon na ho. Aur woh maal zaa’ya ho chuuka ho to agarche oosi saal ki zakaat ke mutta’liq hi kyoon shak na ho oos par zakaat nahi hai.
1862. Faqeer yeh nahi kar sakta ke zakaat lene se pahle ooski miqdaar se kam miqdaar par masslehat kar le ya kisi cheez ko ooski qeemat se zyaada qeemat par bataure zakaat qabool kare aur isi tarah maalik bhi yeh nahi kar sakta ke mustaheq ko is shart par zakaat de ke woh mustaheq oose waapas kar de ga Laikin agar koi mustaheq zakaat lene ke ba’d raazi ho jaaye aur oos zakaat ko oose waapas kar de to koi harj nahi hai. Maslan kisi shakhs par bohot zyaada zakaat waajib ho aur faqeer ho jaane ki wajah se woh zakaat ada na kar sakta ho aur oosne tauba kar li ho to agar faqeer raazi ho jaaye ke oosne zakaat lekar phir oose bakhsh de to koi harj nahi.
1863. Insaan Quraan-e-Majeed, Deeni kitaabein ya, Dua ki kitaabein sehme fi sabeelillah se khareed kar waqf nahi kar sakta hai. Laikin agar rafa a’maa ke liye ooon cheezon ki zarurat ho to ehtayaat-e-waajib ki bina par Haakim-e-shar’a se ijaazat le le.
1864. Insaan maal-e-zaakat se jaae’daad khareed kar apni aulaad ya oon logo ko waqf nahi kar sakta jin ka kharch oos par waajib ho take woh oos jaae’daad ki moonfa’at apne musarraf mein na le aaye.
1865. Hajj aur Ziyaarat par jaane ke liye insaan fi sabeelillah ke hisse se zakaat le sakta hai agarche woh faqeer na ho ya apne saal bhar ke akhrajaat ke liye zakaat le chuka ho laikin yeh is suurat mein hai jabkeh ooska Hajj aur Ziyarat jaana logo ke mafaad mein na ho aur ehtayaat ki bina par aise kaamo mein zakaat kharch karne ke liye haakim-e-shar’a se ijaazat le le.
1866. Agar ek maalik apne maal ki zakaat dene ke liye kisi faqeer ko vakil bana de aur vakil ko yeh ehtemaal ho ke maalik ka iraada yeh tha ke woh khud (ya’ni faqeer) oos maal se kuch na le to is suurat mein woh koi cheez oos mein se apne liye nahi le sakta aur agar faqeer ko yeh yaqeen ho ke maalik ka iraada yeh nahi tha to woh apne liye bhi le sakta hai.
1867. Agar koi faqeer oont, gaaye, bhed, chaandi, sona zakaat ke taur par haasil kare aur oon mein woh sab shara’et maujood ho jo zakaat ke waajib hone ke liye bayaan ki gai hain to zaruri hai ke faqeer oon par zakaat de.
1868. Agar do ashkhaas ek aise maal mein hissedaar hon jiski zakaat waajib ho chuki hai aur oon mein se ek apne hisse ki zakaat de de aur ba’d mein woh maal taqseeem kar le(aur jo shakhs zakaat de chuuka hai) agarche oose yeh ilm ho ke ooske saathi ne apne hisse ki zakaat nahi di aur naa hi ba’d mein dega to ooska apne hisse mein tassaruf karna ishkaal nahi rakhta.
1869. Agar khums aur zakaat kisi shakhs ke zimme waajib ho aur kaffara aur mannat waghairah bhi oos par waajib ho aur woh maqruz bhi ho aur oon sab ki adae’gi bhi na kar sakta ho to agar woh maal jis par khums ya zakaat waajib ho chuki hai talf ho na gaya ho to zaruri hai ke khums aur zakaat de aur agar woh maal talf ho gaya ho to kaffare aur nazar se pahle zakaat, khums aur karza ada kare.
1870. Jis shakhs ke zimme khums ya zakaat waajibul ada ho aur Hajj bhi oospar waajib ho aur woh maqruz bhi ho agar woh mar jaaye aur ooska maal oon tamaam cheezon ke liye kaafi na ho to agar woh maal jispar khums aur zakaat waajib ho chuke ho talf ho jaaye to zaruri hai ke khums ya zakaat ada ki jaaye aur ooska baaqi maan’da maal karze ki ada’egi ke liye kharch kiya jaaye. Agar woh maal jis par khums aur zakaat waajib ho chukha ho talf ho gaya ho to zaruri hai ke ooska maal karz ki adae’gi par karch kiya jaaye aur is suurat mein agar kuch bach jaaye agar to Hajj kiya jaaye agar zyaada bacha ho to oose khums aur zakaat par taqseem kar diya jaaye.
1871. Jo shakhs ilm haasil karne mein massghool ho agar ilm haasil na kare to apni rozi kamaane ke liye kaam kar sakta ho, agar ooska ilm haasil karna waajib-e-a’ini ho to fuq’ra ke hisse se oose zakaat de sakte hain aur agar oos ke ilm ka haasil karna awami bahduud ke liye ho to fi sabeelillah ki mad se ehtayaat ki bina par Haakim-e-shar’a ki ijaazat se oosko zakaat dena jayez hai. In do suuraton ke a’lawa oosko zakaat dena jayez nahi hai.
No comments:
Post a Comment