1579. Jo suuratein bayaan ho chuki hai oon ke al’awa in chand suuraton mein insaan par sirfiroze ki qaza waajib hai aur kaffara waajib nahi hai.
(1) Ek shakhs Ramadhan ki raat mein joonub ho jaaye aur jaisa ki massla no. 1601 mein tafseel se bataya gaya hai keh subh ki adhan tak dusri neend se bedaar na ho.
(2) Roze ko baatil karne wala kam na kia ho laikin roze ki niyyat na kare ya riya kare ya roza na rakhne ka iraada kare. Isi tarah massla no. 1551 mein batayi gayi tafseel ke mutabiq kisi aise kaam ka iraada kare jo roze ko baatil karta hai.
Ramadhan mein ghusl-e-janabat karna bhool jaaye aur ek ya kayi din roze rakhta rahe.
(3) Ramadhan mein yeh tehqeeq kiye baghair ke subh hui hai ya nahi koi aisa kaam kare jo roze ko baatil karta ho aur ba’d mein oose pata chale ke subh ho chuki thi.
(5) Koi kahe ke subh nahi hui aur insaan ooske kehne ki bina par koi aisa kaam kare jo roze ko baatil karta ho aur ba’d mein pata chale ke subh ho gayi hai.
(6) Koi kahe ke subh ho gayi hai aur insaan ooske kehne par yaqeen na kare ya samjhe ke mazaq kar raha hai ya khud tehqeeq na kare aur koi aisa kaaam kare jo roze ko baatil karta ho aur ba’d mein oose pata chale ke subh ho gayi thi.
(7) Koi shakhs kisi ke kehne par jiska qaul ooske liye shar’an hujjat ho ya woh ghalti karte hue yeh samhjta ho ke ooska qaul hujjat hai, roza iftaar karle aur ba’d mein oose pata chale ke abhi maghrib ka vaqt nahi hua hai.
(8) Insaan ko yaqeen ya itminaan ho ke maghrib ho gayi hai aur woh roza iftaar kar le aur ba’d mein oose pata chale ke maghrib nahi hui thi. Laikin agar mutla’ abr aaluuda ho ya oos jaisi koi kaifiyat ho aur insaan iis gumaan ki tehet roza iftaar kar le ke maghrib ho gayi hai aur ba’d mein ma’loom ho ke maghrib nahi hui thi to ehtayaat ki bina par is suurat mein qaza waajib hai.
(9) Insaan pyaas ki wajah se kulli kare ya’ni paani muh mein lekar ghumaaye aur beikhtayaar paani paet mein chala jaaye. Laikin agar insaan bhool jaaye ke roze se hai aur paani gale se uutar jaaye ya pyaas ke al’awa kisi dusri suurat mein ke jahan kulli karna mustahab hai. Jaise wuzu karte vaqt kulli kare aur paani beikhtayaar paet mein chala jaaye to ooski qaza nahi hai.
(10) Koi shakhs majboori, izteraari ya taqqaiyye ki haalat mein roza iftaar kare jab ke majboori ya taqqaiyye mein khaya peeya ya jama’a kiya ho, ehtayaat-e-waajib ki bina par baaqi cheezon mein bhi yahi hukm hai.
1580. Agar rozedaar paani ke al’awa koi cheez muh mein dale aur woh beikhtayar paet mein chali jaaye ya naak mein paani dale aur woh beikhtayaar neeche chala jaaye to oos par qaza waajib nahi hai.
1581. Rozedaar ke liye zayaada kulliyan karna makruh hain aur agar kulli ke ba’d lo’aab-e-dehen nigalna chahe to behtar hai ke pahle teen dafa’ lo’aab thook de.
1582. Agar kisi shakhs ko ma’loom ho ke kulli karne se beikhtayaar ya bhool jaane ki wjah se paani halq mein neeche uutar jaayega to zaruri hai ke kulli na kare aur is suurat mein agar kulli kare laikin paani halq se na ootre to ehtayaat-e-waajib ki bina par qaza zaruri hai.
1583. Agar kisi shakhs ko Ramadhan mein tehqeeq karne ke ba’d ma’loom na ho ke subh ho gayi hai aur koi aisa kaam kare jo roze ko baatil karta hai aur ba’d mein oose pata chale ke subh ho gayi hai to ooske liye roze ki qaza karna zaruri nahi.
1584. Agar kisi shakhs ko shak ho ke maghrib ho gayi hai ya nahi to woh roza iftaar nahi kar sakta laikin agar woh shak kare ke subh ho gayi ya nahi to woh tehqeeq karne se pahle aisa kaam kar sakta hai jo roze ko baatil karta ho.
No comments:
Post a Comment