1605. Jis musaafir ke liye safar mein chaar rak’ati namaaz ke bajaye do rak’at namaaz padhna zaruri ho oose roza nahi rakhna chahiye laikin woh musafir jo poori namaaz padhta ha maslan jiska pesha hi safar ho ya jiska safar kisi na jayez kaam ke liye ho to zaruri hai ke safar mein roza rakhe.
1606. Ramadhan mein safar karne mein koi harj nahi laikin roze se bachne ke liye safar karna makruh hai. Yahi hukm har safar ka hai ba juz oos safar ke jo Hajj, Umrah, ya kisi aur zaruri kaam ke liye ho.
1607. Agar Ramadhan ke rozo ke al’awa kisi khaas din ka roza insaan par waajib ho agar woh roza ijaare ya ijaare ke ma’nind kisi wajah se waajib hua ho ya ikhtelaaf ke dino mein se teesra din ho to oos din safar nahi kar sakta aur agar safar mein ho aur agar theherna mumkin ho to to zaruri hai ke 10 din ek jagah qayaam karne ki niyyat kare aur oos din ka roza rakhe laikin agar oos din ka roza mannat ki wajah se waajib ho to zaahir yeh hai ke oos din safar karna jayez hai aur qayaam karne ki niyyat karna waajib nahi. Agarche behtar yeh hai ke jab tak safar karne ke liye majboor na ho safar na kare aur agar safar mein ho qayaam karna ki niyyat kare aur agar safar mein ho 10 din theherne ka iraada kare.
1608. Agar koi shakhs mustahab roze ki mannat mane laikin oos ke liye din mo’yyin na kare to woh shakhs safar mein aisa mannati roza nahi rakh sakta. Laikin agar mannat mane ke safar ke dauraan ek maqsus din roza rakhega to zaruri hai ke woh roza safar mein rakhe neiz agar mannat mane ke safar mein ho ya na ho ek maqsus din ka roza rakhega to zaruri hai ke agar safar mein ho tab bhi oos din ka roza rakhe.
1609. Musaafir talab-e-haajat ke liye Madina-e-tayyaba mein teen din mustahab roze rakh sakta hai aur ehwat yeh hai ke woh teen din Budh, Jumeraat aur Juma ho.
1610. Koi shakhs jise ‘ilm na ho ke musaafir ka roza rakhna baatil hai, roza rakh le aur din hi din mein yeh hukm-e-massla ma’loom ho jaaye to ooska roza baatil hai. Laikin agar maghrib tak hukm na mal’oom ho to ooska roza sahi hai.
1611. Agar koi shakhs yeh bhool jaaye ke woh musaafir hai ya yeh bhool jaaye ke musaafir ka roza baatil hota hai aur safar ke dauraan roza rakh le to ehtayaat ki bina par ooska roza baatil hai.
1612. Agar rozedaar zohur ke ba’d safar kare to zaruri hai ke ehtayaat ki bina par roze ko tamaam kare aur is suurat mein roze ki qaza karna zaruri nahi aur agar zohur se pahle safar kare to ehtayaat ki bina par oos din ka roza nahi rakh sakta hai khasusan jab raat hi se ooska iraada safar karne ka ho. Laikin har suurat mein Hadd-e-tarrakhus tak aisa koi kaam nahi karna chahiye jo roze ko baatil karta ho warna ooska kaffara waajib hoga.
1613. Agar musafir khwah woh Ramadhan mein fajr se pahle safar mein ho ya roze se ho aur safar kare aur zohur se pahle apne watan pohoonch jaaye ya aisi jagah pohoonch jaaye jahan woh 10 din qayaam karna chahta ho aur oosne aisa koi kaam na kiya ho jo roze ko baatil karta ho to zaruri hai ke oos din ka roza rakhe aur is suurat mein ke roze ki qaza bhi nahi aur agar koi aisa kaam kiya jo roze ko baatil karta ho to oos din ka roza oospar waajib nahi aur zaruri hai ke ooski qaza kare.
1614. Agar musafir zohur ke ba’d apne watan pohoonche ya kisi aisi jagah pohoonche jahan woh 10 din qayaam karna chahta ho ehtayaat-e-waajib ki bina par ooska roza baatil hai aur zauri hai ke ooski qaza kare.
1615. Musaafir aur woh shakhs jo kisi uzr ki wajah se roza na rakh sakta ho ooske liye Ramadhan mein jama’a karna aur paet bahr kar khaana makruh hai.
No comments:
Post a Comment