1621. Mahine ki pehli taarikh (mandarja zel) chaar cheezo se saabit hoti hai :
(1) Insaan khud chaand dekhe.
(2) Ek aisa giroh jiske kehne par yaqeen ya itminaan ho jaaye yeh kahe ke hamne chaand dekha hai aur isi tarah har woh cheez jiski badaulat yaqeen aa jaaye ya kisi a’qli boonyaad par yaqeen haasil ho jaaye.
(3) Do a’dil mard yeh kahe ke hamne chaand dekha hai laikin agar woh chaand ke alag alag ausaaf baayan kare to pehli taarikh saabit nahi hogi aur yahi hukm hai agar insaan oonki ghalti ya yaqeen ka itminaan ho ya oon do a’dilo ki gawaahi se do aur a’dilo ki gawaahi ya oos jaisi koi cheez takraa rahi ho maslan shehar ke shahar se log chaand dekhne ki koshish kare laikin do a’dil aadmiyo ke al’awa koi dasra chaand dekhne ka da’wa na kare ya kuchh log chaand dekhne ki koshish kare aur oon logo mein se do a’dil chaand dekhne ka da’wa kare aur dasro ko chaand nazar na aaye halan ki oon logo mein do aur aa’dil aadmi aise ho jo chaand ki jagah pehchhanne, nigaah ki tezi aur digar khasusiyaat mein oon pahle do aadimiyo ke maa’nin hi matla bhi saaf ho ke aur kisi aisi cheez ke hone ka ehtemaal bhi na ho jo oonki deed mein rukaawat ban sake to aisi soora mein do a’dil aadmiyo ki gawaahi se pehli taarikh saabit nahi hogi
(4) Sha’aban ki pehli taarikh se 30 din guzar jaaye jin ke guzarne par Ramadhan ki pehli taarikh saabit ho jaati hai aur Ramadhan ki pehli taarikh se 30 din guzar jaaye jin ke guzarne par shawwal ki pehli taarikh saabit hoti jaati hai.
1622. Haakim-e-sha’ra ke hukm se mahine ki pehli taarikh saabit nahi hoti siwaaaye is ke ke ooske hukm se ya oos ke nazdeek chaand saabit ho jaane se chaand nazar aane ka itminaan haasil ho.
1623. Manjabon ki gawaahi se pehli taarikh saabit nahi hoti laikin agar insaan ko oonke kehne par yaqeen ya itminaan ho jaaye to zaruri hai ke oonke kehne par amal kare.
1624. Chaand ka aasmaan par buland hona ya ooska deir se ghuroob hona is baat ki daleel nahi hai ke saabeqa raat chaand raat thi isi tarah agar chaand ke gird halqa ho to yeh is baat ki daleel nahi hai ke dusri raat ka chaand hai
1625. Agar kisi par Ramadhan ki pehli taarikh saabit na ho aur woh roza na rakhe aur ba’d mein saabit ho jaaye ke guzishta raat hi chand raat thi to zaruri hai ke oos din ke roze ki qaza kare.
1626. Agar kisi shehar mein mahine ki pehli taarikh saabit ho jaaye aur dusre shehro mein bhi jin ka oofaq oos shehar se muttahid ho mahine ki pehli taarikh hoti hai. Yahan par oofaq ke muttahid hone se muraad yeh hai ke agar pahle shehar mein chaand dikhaayi de to dusre shehar mein bhi baadal ki tarah koi rukaawat na hone ki suurat mein chaand dikhaayi deta. Aisa isi suurat mein hoga jab dasra shehar agar pahle shaher ki maghribi simt mein ho to khat-e-arz ke a’itbaar se, pahle shehar se nazdeek ho aur agar masshriq simt mein ho to oon dono sheharo ka oofaq ek hone ka yaqeen haasil ho jaaye, chahe yeh yaqeen isi tarah haasil ho ke pahle shehar mein chaand nazar aane ki miqdaar, dono shehro mein sooraj ghuroob hone ke darmiyaani faasle ki miqdaar se zayaada ho.
1627. Jin dino ke mutta’liq insaan ko ‘ilm na ho ke Ramadhan ka aakhri din hai ya shawwal ka pehla din, oos din zaruri hai ke roza rakhe. Laikin agar din hi din mein oose pata chale ke shawwal ki pehli hai to roza iftaar kar le.
1628. Agar koi shakhs qaid mein ho aur Ramadhan ke baare mein yaqeen na kar sake to zaruri hai ke gumaan par amal kare laikin agar quwi gumaan par amal kar sakta ho to za’eef gumaan par amal nahi kar sakta aur zaruri hai ke quwi tareen ehtemaal haasil karne ke liye muqammal sa’ee aur koshish kare aur agar koi raasta na ho to aakhri chaara kaar ke taur par qur’a andaazi Kar le, agar ooske ehtemaaal ki quwwat mein izaafa ho raha ho aur agar gumaan par amal karna mumkin na ho to zaruri hai ke jis mahine ke baare mein ehtemaal ho ke Ramadhan hai oos mahine mein roze rakhe laikin zaruri hai ke oos mahine ko yaad rakhe. Chunanche ba’d mein oose ma’loom ho ke woh Ramadhan ya ooske ba’d ka zamaana tha to ooske zimme kuch nahi hai. Laikin agar ma’loom ho ke Ramadhan ke pahle ka zamaana tha to zaruri hai ke Ramadhan ke rozo ki qaza kare.
No comments:
Post a Comment