1585. Agar koi deewana achchha ho jaaye to ooske liye a’lam-e-deewaangi ke rozo ki qaza waajib nahi.
1586. Agar koi kaafir musalmaan ho jaye to oos par a’lm-e-kufr ke rozo ki qaza waajib nahi laikin agar ek musalmaan kaafir ho jaaye aur phir dobara musalmaan ho jaaye to zaruri hai ke ayyam-e-kufr ke rozo ki qaza baja laaye.
1587. Jo roze masst hone ki wajah se chhoot jaaye oonki qaza baja laaye khawah jin cheez ki wajah se woh masst hua ho woh ilaaj ki garz se hi kyoon na khaayi ho.
1588. Agar koi shakhs kisi uzr ki wajah se chand dino tak roza na rakhe aur ba’d mein shak kare ke ooska uzr kis vaqt za’el hua tha to ooske liye waajib nahi hai ke jitni muddat roze na rakhne ka zayaada ehtemaal ho oos ke mutabiq qaza ba’ja laaye. Maslan agar koi shakhs Ramadhan se pahle safar kare aur oose yeh ma’loom na ho ke woh Maahe Mubaarak ki paanchvi taarikh ko safar se waapas aaya tha ya chhati ko maslan oosne maahe mubarak ki aakhir mein safar shuru kiya ho aur maahe mubarak khatm hone ke ba’d vapas aaya ho aur oose pata na ho ki 25 Ramadhan ko safar kiya tha ya 26 Ramadhan ko to dono suuraton mein woh kamtar dino ya’ni paanch rozo ki qaza kar sakta hai. Agarche Ehtayaat-e-mustahab yeh hai ke zayaada dino ya’ni 6 dino ki qaza kare.
1589. Agar kisi shakhs par chand saalo ki Ramadhan ke rozo ki qaza waajib ho Jis saal ki rozo ki qaza pahle karna chahe kar sakta hai laikin agar aakhri Ramadhan ke rozo ka vaqt tang ho maslan aakhri Ramadhan ki paanch rozo ki qaza ooske zimme ho aur aa’enda Ramadhan bhi shuru hone mein bhi paanch din reh gaye ho to behtar yeh hai ke pahle aakhri Ramadhan ke rozon ki qaza baja laaye.
1590. Agar kisi shakhs par chand saalo ke Ramadhan ke rozo ki qaza waajib ho aur woh roze ki niyyat mo’ayyin na kare ke kaoon se Ramadhan ki roze ki qaza kar raha hai to ooska shumaar aakhri Ramadhan ki qaza mein shumaar nahi hoga aur natijatan taakheer ka kaffara oos par saakit nahi hoga.
1591. Jis shakhs ne Ramadhan ka qaza roza rakha ho oos roze ko zohur se pahle tod sakta hai. Laikin agar qaza ka vaqt tang hai to behtar hai ke roze ko na tode.
1592. Agar kisi ne masst ke qaza ka roza rakha ho to behtar yeh hai ke zohur ke ba’d roza na tode.
1593. Agar koi shakhs kisi bimaari ya Haiz ya Nifaas ki wajah se Ramadhan ke roze na rakhe aur ooski muddat guzarne se pahle ke jis mein woh oon rozo ki jo oos ne nahi rake the qaza kar sakta ho mar jaaye to oon rozo ki qaza nahi hai.
1594. Agar koi shakhs bimaari ki wajah se Ramadhan mein roze na rakhe aur ooski bimaari aa’enda Ramadhan tak lambi ho jaaye to jo roze oosne na rakhe ho oonki qaza oos par waajib nahi hai aur zaruri hai ke har din ke liye ek mad(taqreeban 750 gms)ta’aam ya’ni gandum ya jow ki roti kisi faqeer ko de laikin agar kisi aur uzr maslan safar ki wajah se roze na rakhe aur ooka uzr aa’enda Ramadhan tak baqi rahe to zaruri hai ke jo roze na rakhe ho oon ki qaza kare aur ehtayaat-e-waajib yeh hai ke har ek din ke liye ek mad ta’aam bhi faqeer ko de.
1595. Agar koi shakhs bimaari ki wajah se Ramadhan ke roze na rakhe aur Ramadhan ke ba’d ooski bimaari door ho jaaye laikin koi dasra uzr laahaq ho jaaye jiski wajah se woh Ramadhan tak qaza roze na rakh sake to zaruri hai ke jo roze na rake ho oonki qaza baja laaye aur ehtayaat-e-waajib ki bina par har din ke liye ek mad ta’am faqeer ko bhi de. Yahi hukm oos vaqt bhi hai jab Ramadhan mein bimaari ke al’awa koi aur uzr rakhta ho aur Ramadhan ke ba’d woh uzr door ho jaaaye aur aa’enda saal ke Ramadhan tak bimaari ki wajah se roze na rakh sake.
1596. Agar koi shakhs kisi uzr ki wajah se Ramadhan mein roze na rakhe aur Ramadhan ke ba’d ooska uzr door ho jaaye aur woh aae’da saal tak amdan roze ki qaza na baja laye to zaruri hai ke rozo ki qaza kare aur har din ke liye ek mad ta’am faqeer ko de.
1597. Agar koi shakhs qaza roze rakhne mein kotahi kare hatta ke vaqt tangi mein oose koi uzr pesh na aa jaaye to zaruri hai ke rozo ki qaza kare aur ehtayaat ki bina par har ek din ke liye ek mad ta’am faqeer ko de. Agar uzr door hone ke ba’d musammam iraada rakta ho ke woh rozo ki qaza baja laayega laikin qaza baja lane se pahle tang vaqt mein oose koi uzr pesh aa jaaye to oos suurat mein bhi yahi hukm hai.
1598. Agar insaan ka marz chand saal lamba ho jaaye to zaruri hai ke tandurust hone ke ba’d aakhri Ramadhan ke chhute hue rozo ki qaza baja laaye aur iis se pahle ke maahe mubarak ke har ek din ke rozo ke liye ek madd ta’am faqeer ko de.
1599. Jis shakhs ke liye har roze ke a’vaz ek madd ta’am faqeer ko dena zaruri ho woh chand dino ka kaffaara ek hi faqeer ko de sakta hai.
1600. Agar koi shakhs Ramadhan ki rozo ki qaza karne ke liye kayi saal tak takheer kar de to zaruri hai ke qaza kare aur pahle saal mein takheer karne ki bina par har roze ke liye ek mad ta’am faqeer ko de laikin baaqi kayi saal ki takheer ke liye oos par kuch bhi waajib nahi hai.
1601. Agar koi shakhs Ramadhan ke roze jaan bhoojh ke na rakhe to zaruri hai ke oon ki qaza baja laaye aur har din ke liye do mahine roze rakhe ya 60 faqeero ko khaana khilaaye ya ek ghulaam azaad kare agar a’enda Ramadhan tak oon rozo ki qaza kare to ehtayaat-e-laazim ki bina par har din ke liye ek mad ta’am kaffara bhi de.
1602. Agar koi shakhs jaan bhoojh ke Ramadhan ka roza na rakhe aur oon mein kayi dafa’’ jama’a ya istimna kare to kaffara takraar nahi hoga. Aise hi agar kayi dafa’ koi aisa kaam kare jo roze ko baatil karta ho maslan khaana khaaye tab bhi ek kaffara kaafi hai.
1603. Baap ke marne ke ba’d bade bete par ehtayaat-e-laazim ki bina par zaruri hai ke baap ke rozo ki qaza oosi tarah baja laaye jaise ki namaaz ke silsile mein massla no. 1371 mein tafseel se bataya gaya hai. Woh yeh bhi kar sakta hai ke har din ke badle750 gram khana kisi faqeer ko de. Chahe waariso ke raazi hone ki suurat mein mayyat ke maal hi se de.
No comments:
Post a Comment