1380. Yawmiah namaazein jama’at ke sathh padhna mustahab hai aur subah, maghrib wa ‘isha ki namaazon ke liye khasusan massjid ke pados mein rahne waale aur massjid ki aazan ki awaaz suoonne waale ke liye bohut zayada taakeed ki gayee hai. Isi tarah mustahab hai keh baaqi wajib namaazon ko bhi jama’at se adaa kiya jaye. Albatta namaaz tawaaf aur chaand wa suraj grahan ke a’alawa namaaz aayaat mein yeh saabit nahin hsaka keh shari’at ne jama’at se namaaz padhne ki ijaazat di hai ya nahin.
1381. Mo’atbar riwayaat ke mutaabiq bajama’at namaaz faradi namaaz se 25 goonaa afzal hai.
1382. Be a’itnaayee baratte huye namaaz jama’at mein shareek na hona jaayez nahin hai aur insaan ke liye yeh moonasib nahin hai keh baghair azr ke namaaz jama’at ko tark kare.
1383. Mustahab hai keh insaan sabr kare takeh namaaz jama’at ke sathh padhe aur woh bajama’t namaaz jo mukhtasar padhi jaye oos faraadi namaaz se behtar hai jo tool digar padhe jaye aur namaaz ya jama’at oos namaaz se behtar hai jo awwal vaqt mein faraadi y’ani tanhaa padhi jaye aur vaqt fazilat ke b’ad padhi jaane waali jama’at ka, fazilat ke vaqt mein padhi jaane waali faraadi se behtar hona ma’loom nahin.
1384. Jab jama’at ke saathh namaaz padhi jaane lage to mustahab hai keh jis shakhs ne tanhaa namaaz padhi ho woh dobaarah jama’at ke saathh padhe aur agar oose b’ad mein pata chale keh oos ki pahli namaaz baatil thhi to dusri namaaz kaafi hai.
1385. Agar imam jama’at ya maqtadi jama’at ke saathh namaaz padhne ke b’ad oosi namaaz ko dobaarah jama’at ke saathh padhna chaahe to agar che oos ka mustahab hona saabit nahin. Laikin dobaarah padhne ki koi mumaniat nahin hai.
1386. Jis shakhs ko namaaz mein is qadr waswasa hotaa ho keh oos namaaz ke baatil hone ka maujub ban jaataa ho aur sirf jama’at ke saathh namaaz padhne se oose waswase se nijaat milti ho to zaruri hai keh woh namaaz jama’at ke saathh padhe.
1387. Agar baap ya maa apni aulaad ko hukm dein keh namaaz jama’at ke saathh padhe to ehteyaat-e-mustahab hai keh namaaz jama’at ke saathh padhe. Albatta jab bhi waaledain ki taraf se koi hukm ya rok tok mohabbat ki wajah se ho aur oos ki mukhalafat se oonhein azeeyat hoti ho to aulaad ke liye oon ki mukhalafat karna haraam hai.
1388. Mustahab namaaz ki bhi jagah ehteyaat ki bina par jama’at ke saathh nahin padhi ja sakti laikin namaaz isteqaa jo talab baraan ke liye padhi jaati hai jama’at ke saathh padh sakte hain aur isee tarah woh namaaz bhi jama’at ke saathh padh sakte hain jo pahle wajib rahi ho aur phir kisi wajah se mustahab ho gayee ho, maslan namaaz Eid ul fitr aur namaaz Eid Qurbani ho imam mehdi alaih alsalaam ke zamaane tak wajib thhi aur oon ki ghaibat ki wajah se mustahab ho gayee hai.
1389. Jis vaqt Imam jama’at yawmiah namaazon mein se koi namaaz padhaa raha ho to oos ki iktedaa koi si bhi yawmiah namaaz mein ki ja sakti hai.
1390. Agar imam jama’at yowmiah namaazon mein se qaza shudah apni ya kisi dusre shakhs ki aisee namaaz ki qaza padhaa raha ho jis ka qaza hona yaqeeni ho to oos ki aktadaar ki jaa sakti hai. Laikin agar woh apni ya kisi dusre ki namaaz ehteyaatan padhaa raha ho to oos ki iktedaa jaayez nahin. Magar yeh keh maqtadi bhi ehteyaatan padh raha ho aur Imam ki ehteyaat ka sabab maqtadi ki ehteyaat ka bhi sawaab ho laikin zaruri nahin hai keh maqtadi ki ehteyaat ka koi dasra sabab na ho.
1391. Agar Insaan ko yeh ’ilm na ho keh jo namaaz Imam padh raha woh wajib oanchganaa namaazon mein se hai ya mustahab namaaz hai to oos namaaz mein Imam ki iktedaa nahin ki ja skati hai.
1392. Jama’at ke sahi hone ke liye yeh shart hai keh Imam aur maqtadi ke darmiyan aur isee tarah ek maqtadi aur dusre aise maqtadi ke darmiyan jo is maqtadi aur Imam ke darmiyan waasta ho koi cheez ha’el na ho aur ha’el cheez se muraad woh cheez hai jo oonhein ek dusre se judaa kare khawah dekhne mein man’e ho jaise keh pardah ya deewaar waghairah ya dekhne mein ha’el na ho jaise sheesha. Pas agar namaaz ki tamaam ya b’az halation mein Imam aur maqtadi ke darmiyan ya maqtadi aur dusre aise maqtadi ke darmiyan jo itsaal ka zikr ho koi aisee cheez ha’el ho jaye to jama’at baatil hogi aur jaisa keh b’ad mein zikr hoga aurat is hukm se mutsanaa hai.
1393. Agar pahli saf ke lanbaa hone ki wajah se is ke dono taraf khade hone waale log Imam jama’at ko na dekh saken tab bhi woh iktedaa kar sakte hain aur isee tarah agar dusri safon mein se kisi saf ki lanba’ee ki wajah se is ke dono taraf khade hone waale log apne se aage waali saf ko na dekh saken tab bhi woh iktedaa kar sakte hain.
1394. Agar jama’at ki safein massjid ke darwaaze tak pohoonch jayein to jo shakhs darwaaze ke samne saf ke peechhe khada ho oos ki namaaz sahi hai. Neez jo ashkhaas is shakhs ke peechhe khade hokar Imam jama’at ki iktedaa kar rahe hon oon ki namaaz sahi hai balkeh oon logon ki namaaz bhi sahi hai jo dono taraf khade namaaz padh rahe hon aur kisi dusre maqtadi ke taoosat se jama’at se mutasil hon.
1395. Jo shakhs satoon ke peechhe khada ho agar woh daayein ya baayein taraf kisi dusre maqtadi ke tuwastat se Imam jama’at se itsaal na rakhta ho to woh iktedaa nahin kar sakta.
1396. Imam jama’at ke khade hone ki jagah zaruri hai keh maqtadi ki jagah se zayada oonchee na ho laikin agar ma’mooli oonchi ho to harj nahin. Neez agar dhalwan zameen ho aur Imam oos taraf khada ho jo zayada buland ho to agar dhalwan zayada na ho to koi harj nahin.
1397. Agar maqtadi ki jagah Imam ki jagah oonchi ho to koi harj nahin. Laikin agar is qadr oonchee ho keh yeh na kaha jaa sake keh woh ek jagah jam’aa huye hain to jama’at sahi nahin hai.
1398. Agar jama’at mein izaafa mein itsaal ka zari’e ek samajhdaar bachchaa y’ani aisa bachchaa jo achchhe bure ki samajh rakhta ho aur woh log na jante hon keh oos ki namaaz baatil hai to iktedaa kar sakte hain. Yahi hukm ghair shia ‘isna ashari shakhs ke liye is surat mein hai jab oos ke mazhab ke mutaabiq oos ki namaaz ghalat na ho.
1399. Imam ki takbeer ke b’ad agar agli saf ke log namaaz ke liye tayyar hon aur takbeer kahne hi waale hon to jo shakhs peechhli saf mein khada ho woh takbeer kah sakta hai laikin ehteyaat-e-mustahab yeh hai keh woh intezaar kare takeh agli saf waale takbeer kah lein.
1400. Agar koi shakhs jaanta ho keh agli safon mein se ek saf ki namaaz baatil hai to woh peechhli safon mein iktedaa nahin mar sakta hai laikin agar oose yeh ‘ilm na ho keh oos saf ke logon ki namaaz sahi hai ya nahin to iktedaa kar sakta hai.
1401. Jab koi shakhs jaanta ho keh Imam ki namaaz baatil hai, maslan oose ‘ilm ho keh Imam wazu se nahin hai to khawah Imam khud oos amr ki jaanib mutawajja nab hi ho woh shakhs oos ki iktedaa nahin kar sakta.
1402. Agar maqtadi ko namaaz ke b’ad pata chale keh Imam a’adil na thha ya kaafir thha ya kisi wajah maslan wazu na hone ki wajah se oos ki namaaz baatil thhi to oos ki namaaz sahi hai.
1403. Agar koi shakhs namaaz ke dauraan shak kare keh oos iktedaa ki hai ya nahin chunanche a’laamaton ki wajah se oose itminaan ho jaye keh iktedaa ki hai, to zaruri hai keh namaaz jama’at ke saathh hi khatm kare, basurat digar zaruri hai keh namaaz faraada ki niyyat se khatm kare.
1404. Agar namaaz ke dauraan maqtadi kisi azar ke baghair faraada ki niyyat kare to oos ki jama’at ke sahi hone mein ishkaal hai laikin oos ki namaaz sahi hai. Magar yeh keh oos ne faraada namaaz mein oos ka jo farizah hai, oos par ‘mal na kiya ho to ehteyaat-e-wajib ki bina par zaruri hai keh namaaz ko dohra’e. Laikin agar kisi aisee cheez ko kam ya zayada kar diya jo azar ki surat mein namaaz ko baatil nahin karti. Maslan agar namaaz ki ibteda se faraada ki niyyat na ho aur qir’at bhi na ki ho laikin ruku’ mein oose qasd karna padhe to aisee surat mein faraada ki niyyat se namaaz khatm kar sakta hai aur oose dobaarah padhna zaruri nahin hai. Isee tarah pesh namaaz ki pairwi ke liye ek sajdah zayada ho gaya ho to bhi yahi hukm hai.
1405. Agar maqtadi Imam ke alhamd aur surah padhne ke b’ad kisi uzr ki wajah se faraada ki niyyat kare to alhamd aur swrah padhna zaruri nahin hai. Laikin agar kisi uzr ke baghair ya (Imam ke) alhamd aur surah khatan karne se pahle faeaadi ki niyyat kare to ehteyaat ki bina par zaruri hai keh mukammal alhamd aur surah padhe.
1406. Agar koi shakhs namaaz jama’at ke dauraan faraada ki niyyat kare to phir woh dobaarah jama’at ki niyyat nahin kar sakta. Yahi hukm ehteyaat-e-wajib ki bina par oos vaqt hai jab mazbazab ho keh faraada ki niyyat kare ya na kare aur b’ad mein namaaz ko jama’at ke saathh tamaam karne ka massumim iraadah kare.
1407. Agar koi shakhs shak kare keh namaaz ke dauraan oos ne faraada ki niyyat ki hai ya nahin to zaruri hai keh yeh samajh le keh oos ne faraada ki niyyat nahin ki.
1408. Agar koi shakhs oos vaqt iktedaa kare jab Imam ruku’ mein ho aur Imam ke ruku’ mein shareek ho jaye agar che Imam ne rulu’ ka zikr padh liya ho oos shakhs ki namaaz sahi hai aur woh ek rak’at shumaar hogi laikin agar woh shakhs baqadr ruku’ ke jhuke taahum Imam ko ruku’ mein na paa sake to woh shakhs apni namaaz faraada ki niyyat se khatm kar sakta hai aur yeh bhi kar sakta hai keh agli rak’at taahum Imam se milne ke liye namaaz ko todh de.
1409. Agar koi shakhs oos vaqt iktedaa kare jab Imam ruku’ mein ho aur baqdr ruku’ ke jhukne aur shak kare keh Imam ke ruku’ mein shareek hua hai ya nahin to agar yeh shak ruku’ khatm karne ke b’ad hua ho to oos ki jama’at sahi hai. Is ke alawoh dusri surat mein namaaz faraada ki niyyat se poori kar sakta hai aur yeh bhi kar sakta hai keh agli rak’at mein Imam se milne ke liye namaaz todh de.
1410. Agar koi shakhs oos vaqt iktedaa kare jab Imam ruku’ mein ho aur oos se pahle keh woh baqdr ruku’ jhuke, Imam ruku’ se sur utthha le to oose ikhteyaar hai keh faraada ki niyyat kar ke namaaz poori kare ya qurbat mutlaqah ki niyyat se Imam ke saathh sajde mein jaye aur sajde ke b’ad qayaam ki haalat mein takbeeratul ehraam aur kisi zikr ka qasd kiye baghair dobaarah takbeer kahe aur namaaz ke saathh padhe ya agli rak’at mein jama’at mein shareek hone ke liye namaz todh de.
1411. Agae koi shakhs namaaz ki ibtedaa mein ya alhamd aur surah ke dauraan iktedaa kare aur ittefaqoon oos se pahle keh woh ruku’ mein jaye Imam apna sar ruku’ se uttha le to oos shakhs ki namaaz sahi hai.
1412. Agar koi shakhs namaaz ke liye aise vaqt pohoonche jab Imam namaaz kaa aakhri tashadud padh raha ho aur woh shakhs chaahtaa ho keh namaaz jama’at kaa sawaab haasil kare to zaruri hai keh niyyat baandhe aur takbeeratul ehraam kahne ke b’ad baithh jaye aur qurbat mutlaqah ki niyyat se tashadud Imam ke saathh padh sakta hai laikin ehteyaat-e-wajib ki bina par slaam na kahe aur intezaar kare takeh Imam namaaz ka salaam padh le. Iis ke b’ad woh shakhs khada ho jaye aur dobaarah niyyat kiye baghair aur takbeer kahe baghair alhamd aur surah padhe aur oose apni namaaz ki pahli rak’at shumaar kare.
1413. Maqtadi ko Imam se aage nahin hona chahiye balkeh ehteyaat-e-wajib yeh hai keh agar maqtadi zayada hon to Imam ke barabar na khade hon. Laikin agar maqtadi ek aadmi ho to Imam ke barabar khade hone mein koi harj nahin.
1414. Agar Imam mard aur maqtadi aurat ho to agar oos aurat aur Imam ke darmiyaan ya aurat aur dusre mard maqtadi ke darmiyaan jo aurat aur Imam ke darmiyaan itsaal ka zari’a ho, pardah waghairah latka ho to koi harj nahin.
1415. Agar namaaz shuru hone ke b’ad Imam aur maqtadi ke darmiyaan ya maqtadi aur oos shakhs ke darmiyaan jis ke tawasut se maqtadi Imam se mutasik ho par woh ya koi dusri cheez ha’el ho jaye to jama’at baatil ho jaati hai aur laazim hai keh maqtadi faraada namaaz ke wazife par a’mal kare.
1416. Ehteyaat-e-wajib yeh hai keh maqtadi ke sajde ki jagah aur Imam ke khade hone ki jagah ke beech ek lambe tareen qadam se zayada faaslah na ho aur agar insaan ek aise maqtadi ke tawasut se jo is kea age khada ho Imam se mutasil ho tab bhi yahi hukm hai aur ehteyaat-e-mustahab yeh hai keh maqtadi ke khade hone ki jagah aur oos se aage waale shakhs ke khade hone ke darmiyaan oos se zayada faaslah na ho jo insaan ke haalat sajdah mein jaane par hotaa hai.
1417. Agar maqtadi kisi aise shakhs ke tawasut se Imam se mutasil ho jis ne oos ke dayen taraf ya bayen taraf iktedaa ki ho aur saamne se Imam se mutasil na ho to ehteyaat-e-wajib ki bina par zaruri hai keh oos shakhs se jis ne oos ki dayen taraf ya bayen taraf iktedaa ki ho ek lambe tareen qadam se zayada fasle par na ho.
1418. Agar namaz ke dauraan maqtadi aur Imam ya maqtadi aur oos shakhs ke darmiyaan jis ke tawasut se maqtadi Imam se mutasil ho ek lambe tareen qadam se zayada faslah ho jaye to woh apni namaaz faradaa ki niyyat se jaari rakh sakta hai.
1419. Jo log agli saf mein hon agar oon sab ki namaaz khatm ho jaye aur woh fauran dusri namaaz ke liye Imam ki iktedaa na Karen to peechhli saf walon ki niyyat jama’at baatil ho jati hai balkeh agar fauran hi iktedaa kar lein tab bhi peechhli saf ki jama’at sahi hone mein ishkaal hai.
1420. Agar koi shakhs dusri rak’at mein iktedaa kare to oos ke liye alhamd aur surah padhna zaruri nahin. Albatta qoonoot aur tashahhud Imam ke saathh padhe aur ehteyaat yeh hai keh tashahhud padhte vaqt haathon ki oonglian aur pa’on ke talwohn ka agla hissah zameen par rakhe aur ghutne uthhaa le aur tashahhud ke ba’d zaruri hai keh Imam ke saathh khada ho jaye aur alhamd aur agar surah ke liye vaqt na rakhta ho to alhamd ko tamam kare aur ruku’ mein Imam ke saathh mil jaye aur agar poori alhamd padhne ke liye vaqt na ho to alhamd ko adhura chhod kar Imam ke saathh ruku’ mein shaamil ho sakta hai. Laikin is surat mein ehteyaat-e-mustahab yeh hai keh namaaz ko faradaa ki niyyat se padhe.
1421. Agar koi shakhs oos vaqt iktedaa kare jab Imam chaar rak’ati namaaz ki dusri rak’at padhaa raha ho to zaruri hai keh apni namaaz ki dusri rak’at mein jo Imam ki rak’at hogi do sajdon ke b’ad baithh jaye aur wajib miqdaar mein tashahhud padhe aur phir khada ho aur agar teen dafa’ tasbeehaat padhne ka vaqt na raktaa ho to zaruri hai keh ek daf’a padhe aur ruku’ mein apne aap ko Imam ke saathh shareek kare.
1422. Agar Imam teesri ya chawthi rak’at mein ho aur maqtadi jaanta ho keh agar iktedaa karegaa aur alhamd apdhegaa to Imam ke saathh ruku’ mein shaamil na hi sakegaa to ehteyaat-e-wajib ki bina par zaruri hai keh Imam ke ruku’ mein jaane tak intezaar kare oos ke b’ad iktedaa kare.
1423. Agar koi shakhs Imam ke teesri ya chawthi rak’at mein qayaam ki haalat mein jaane ke vaqt iktedaa kare to zaruri hai keh alhamd aur surah padhe aur agar surah padhne ke liye vaqt na ho to zaruri hai keh alhamd tamam kare aur ruku’ mein Imam ke saathh shareek ho jaye aur agar poori alhamd padhne ke liye vaqt na ho to alhamd ko adhura chhudh kar Imam ke saathh ruku’ mein shamil ho skata hai. Laikin is surat mein ehteyaat-e-mustahab yeh hai keh faradaa ki niyyat se namaaz poori kare.
1424. Agar ek shakhs jantaa ho keh agar woh surah ya qoonoot padhe to ruku’ mein Imam ke sathh shareek nahin ho skata aur woh amuman surah ya qoonoot padhe aur ruku’ mein Imam ke sathh shareek na ho to oos ki jama’at batil ho jati hai aur zaruri hai keh woh faradaa taur par namaaz padhe.
1425. Jis shakhs ko itminaan ho keh agar surah shuroo kare ya oose tamam kare to woh ruku’ mein Imam ke sathh shareek ho jayegaa to agar zayada deir na ho rahi ho to ke liye behtar yeh hai keh surah shuroo kare ya agar shuroo kiya ho to oose tamam kare laikin agar itni zayada deir ho rahi ho keh oose Imam ka maqtadi na kaha ja sake to zaruri hai keh oose shuroo na kare aur agar shuroo kar chuka ho to oose pooraa na kare warna oos ki jama’at batil ho jayegi. Albatta agar oos ne mass’la 1223 mein bataye gaye tariqe ke mutabiq faradaa ke wazife ke mutabiq ‘amal kiya ho to oos ki namaaz sahi hai.
1426. Jo shakhs yaqeen rakta ho keh surah padh kar Imam ke sathh ruku’ mein shareek ho jayega aur Imam ki iktedaa khatm nahin hogi, lehaza agar woh surah padh kar Imam ke sathh ruku’ mein shareek na ho sake to oos ki jama’at sahi hai.
1427. Agar Imam qayaam ki haalat mein ho aur maqtadi ko ma’loom na ho keh woh kaoon si rak’at mein hai to woh iktedaa kar sakta hai aur ehteyaat-e-wajib ki bina par zaruri hai keh alhamd aur surah padhe, laikin zaruri hai keh oonhein qurbat ki niyyat se padhe.
1428. Agar koi shakhs is khayaal se keh Imam pahli ya dusri rak’at mein hai alhamd aur surah na padhe aur ruku’ ke b’ad oose pata chal jaye keh Imam teesri ya chawthi rak’at mein thha to maqtadi ki namaaz sahi hai. Laikin agar oose ruku’ se pahle is baat ka pata chal jaye to zaruri hai keh alhamd aur surah padhe aur agar vaqt tang ho to massla 1223 ke mutabiq a’mal kare.
1429. Agar koi shakhs yeh khayaal karte hue alhamd aur surah padhe keh Imam teesri ya chawthi rak’at mein hai aur ruku’ se pahle ya oos ke b’ad oose pata chale keh Imam pahle ya dusri rak’at mein thha to maqtadi ki namaaz sahi hai aur agar yeh baat oose alhamd aur surah padhte hue ma’loom ho to oon ka tamam karna oos ke liye zaruri nahin.
1430. Agar koi shakhs mustahab namaaz padh raha ho aur jama’at qaayem ho jaye aur oose yeh itminaan na ho keh agar mustahab namaaz ko tamam karegaa to jama’at ke sathh shareek ho sakegaa to mustahab yeh hai keh jo namaaz padh raha ho oose chhod de aur namaaz jama’at mein shaamil ho jaye chaahe yeh kaam pahle rak’at mein shareek hone ke liye hi kare.
1431. Agar koi shakhs teen rak’ati ya chaar rak’ati namaaz padh raha ho keh agar namaaz ko poora karegaa to jama’at mein teesri rak’at ke ruku’ mein na gaya ho aur oose yeh itminaan na ho keh agar namaaz ko poora karegaa to jama’at mein shareek ho sakegaa to mustahab hai keh namaaz ki niyyat ke sathh oos namaaz ko do rak’at par khatm kar de aur jama’at ke sathh shareek ho jaye.
1432. Agar Imam ki namaaz khtam ho jaye aur maqtadi tashahhud ya pahla salaam padhne mein masshghul ho to oos ke liye faraada y’ani tanhaa namaaz ki niyyat karna lazim nahin.
No comments:
Post a Comment